La Fondassion dël Museo
Cost museo a sàuta fòra da la passion ëd Pierin Saché che ant ël cors ëd tanti agn a l’ha cheujì, rangià studià e sonà costi strument musicaj, oltra ad avèj componù musiche neuve usand costi strument antich. Travajand an costa manera a l’ha quindi costituì la colession ëd partensa che a l’ha përmetù la fondassion dël museo. Le dificoltà për treuvé na sistemassion pùblica adeguà a l’han portà a parti da l’ann 2021 a la preparassion dël museo virtual con sit Web dedicà.
Ël Museo a resta duvert a tùit j’apassionà e padron dë strument e documentassion pertinent che a veulo condividi figure, video e descrission ëd sò material. Tute le contribussion a saran arconossue con ël riferiment a la persona che a l’ha fornì fòto e anformassion.
Ël museo a l’é disponibil a l’inseriment ëd material ëd diversa proveniensa, fasend se necessari dij session dedicà. Sòn për avèj un quàder comparativ con base geogràfica e coltural europenga.
​
Biografia
​
Pierin Saché a nass an-n’antica cassin-a an sle colin-e tra Monfrà e Turinèis. Na ment viva e pien-a ëd veuja ëd savèj, na capacità manual pa da pòch, an tùit ij camp. Da giovo as fàbrica da sol na ghitara elétrica. A son-a ant ël grup musical « I coralli » e a l’avrìa vossù deje d’apress a la stra dla mùsica. Ma ël percors a l’é stàit n’àutr, anche se pien ëd sucess. A passa a fé impiant elétrich e a rangé angign eletrònich, antant che për passatemp as vagna d’arconòssiment con la fotografìa sotmarin-a.
​ Rivà a la pension, un bel dì a s’artreuva tra le man na tastiera regalà da dj’amis. A l’é a costa mira che le nòte musicaj a sàuto torna fòra e a taco a dansé an soa sensibilità. A torna la mùsica, lo stìmol a compon-e dij neuv tòch e a cheuje strument musicaj dij temp passà. Semiton e nen mach, a pìjo torna vita an soe man, béj e rangià, quèidun con son pì viv e dj’àit con nòte pì dosse… tùit a torno a esprimi la personalità dij fabricant e dij sò temp.
​
Ant l’ann 2021 a fonda ël museo on-line dj’Antich Strument dla Mùsica popolar Piemontèisa e Europenga, curand-ne atualment la diression.
​
​