Finalità dël Museo

​​Jë scòpi dël museo a’mbrasso lë bzògn ëd guerné për ij temp a mnì ij divers caràter dla coltura musical popolar piemontèisa e europenga. Sòn trevés jë strument musicaj originaj che, an época stòrica, a l’han esprimùne diretament e an manera prevalent  la mùsica e ij baj tìpich. Costi baj tìpich a son dzortut: Corenta, Brando, Giga, etc. e a son present dai temp medievaj, se nen prima. Antratan sò espression an mùsica a l’é chërsùa tra metà Eutsent e metà Neuvsent con strument musicaj come l’Armòni, ij «Cassiòt tira e possa» e ij Semiton. Dòp a son rivà an Piemont dle neuve mùsiche (es. Varzer e Pòlka). Con coste neuve mùsiche a son stàit man a man abandonà ij véj strument, përchè pì nen adat rispét a le neuve esigense musicaj.

​

    Për lòn che i l’oma pen-a dit e con l’ariv dla mùsica moderna a metà Neuvsent, nòstri baj e mùsiche tradissionaj a smijavo përdù për sempe. Adess a son stàit an part recuperà e an part reinventà con ël nòm ëd mùsiche Ossitan-e, Céltiche, Trad, Neotrad, etc. ant na continua assion ëd rinovament portà anans da ëd giovo virtuos chèrsù ansima le tradission europenghe.

​

    Ant ël rispét e grand arconossiment ëd lòn che a-i é adess, jë strument musicaj ëd cost museo a veulo dé na panoràmica significativa e fondamental ëd lòn che stòricament a-i era an Piemont e an tanti dj’àit pòst d’Euròpa. Sòn për che an doman as peuda valuté con la giusta documentassion material cola che a l’é stàita nòstra stòria. As veul peui cò dé un segn e na testimoniansa ëd come la rèis dle neuve mùsiche céltiche a fussa già present anche ant la tradission piemontèisa.

 

​

Ël Doman

​Travers jë strument musicaj antich, piemontèis e europengh, cost museo a veul quindi presentessi come testimoniansa material ogetiva, rèis e guida, sia musical che coltural, për ij neuvi generassion dël nòstr teritòri për tùit ij temp che a mniran.

 

​